ლშს... / Lcs...: სალაღობო… Amusing…

განწყობათა ამგვარი შეპირისპირება მკითხველის სახალისოდ დავაპირე…
მაგრამ ბოლოს, ორმოციოდე წლის წინათ საშაიროდ წამოჩიტული სტროფები , დღევანდელი ყოფისგან პროვოცირებულ სტრიქონებს აშკარად დაპირისპირდა…
ამხედრდით ჯიგრებო, ამხედრით!
შეახტით ბრზიალებს, ქანქარებს!
…
არა, უმჯობესია, წარსულში წამოჩიტული სტროფებით დავიწყო:

სალაღობო…
ქალი, ლამაზი ქალობით
დედამ გაუშვა წყალზედა,
ვაჟი ქებული ვაჟობით
დაუხვდა სავალ გზაზედა:

-ქალო, სიცოცხლევ,
ცისა მშვენებავ,
მიშველე რამე…

-ახლოს ნუ მოხვალ,
ხალხი რას იტყვის?!
ბიჭავ!
გზიდანა ჩამომეცალე…

-გოგო, რაი ვქნა,
უცეცხლოდ ვიწვი,
ბევრი ვეწვალე…

-ბილიკ ვიწროა,
ორს არ დაგვიტევს,
გადადექ მეთქი,
თორემ ინანებ!

-კიდეზე ვივლი,
თავი მამიკვდეს,
ბილიკს გაკვალულს
ნუ დაინანებ…

-ხომ არ გაგიჟდი?!
ბალღი გვიყურებს,
წყარომდე მისვლა,
მაინც მაცალე…

-ციმციმ აგიყვან,
ფარვით გაკოცებ,
მტლედ დავედები
შენს ნატერფალებს…

-წყალი გწყურია,
წყაროსთან მიდი,
ჩემი დოქიდან
ყლუპსაც ვერ დალევ…

-შენა მწყურიხარ,
შენ თუ მიშველი,
იარას კოცნით თუ დამიამებ…

-კოცნას ნურც ფიქრობ
ნიავ მდარაჯობს,
მამასთან მისვლას არ დაახანებს…

1969წ.
P.S. რის წყარო, რა წყარო… აგერ ახლა, ერთი ახალგაზრდა ქალბატონი ყვებოდა, თუ როგორ გაიცნო მისმა დაქალმა, აქაურმა ქართველმა გოგომ ინტერნეტში, ”სკაიპით”… სასიძოს ეროვნებას და კანის ფერს არ გავამხელ… საქართველოში ჩამოიტყუა და შინაურებს ისეთი ელდა დამართა, რომ… ჰმ, ”კოცნას ნუ ფიქრობ ნიავ მდარაჯობს, მამასთან მისვლას არ დაახანებს…” რის წყარო, რა წყარო, რა ბალღი, ვინ ბალღი…
ან თუნდაც, იმ დროინდელი

ნაცნობ მოტივზე დანაკვნესი

ნუ მოვიძულებთ ალალ კაცს,
ვინაც სიტყვასა არ გასტეხს,
მტერი ეყოლვის კარგ ყმასა,
მაგრამ მოყვარეს რა დალევს…

სიმართლის აბჯარს ჩაიცვამს
ღმრთისგან ნაბოძი ნიჭითა,
ალღო აუღეთ მის ძახილს,
გული უსიტყვოდ იბრძვისა!..

ვაჟკაცსა გარჯა უხდების
და არა ღრეჭა- ლაქუცი,
ბედ არ შემოგწყრეთ ვაჟებო,
მართალზედ არ თქვათ აუგი…

1970წ
ვის რად უნდა ალალი, თანაც...
რის ნდობა, რა ნდობა და სტრიქონები ასე დალაგდა:

ამხედრით ჯიგრებო, ამხედრით!
შეახტით ბრზიალებს, ქანქარებს,
იბაზრეთ, ილაყბეთ, ავარდით,
აგელვეთ, ჩადრიკეთ, აჩმახეთ!

აქეთ და ადიდეთ ”ბრენდები”
ნაძრახი, ფარსული აზრები…
უსრისეთ ერთმანეთს ტვინები,
იქნება გამოქნათ ”ჯინები…”

დაგეშეთ, მოპირეთ ზრახვები,
დაძარით გრძნობათა რიქშები,
აღაგზნეთ, განავრცეთ ”იზმები”,

დარაზმეთ ”მაგარი ბიჭები!..”2008წ.

ჯინი _არაბულ მითოლოგიაში: ცეცხლისა და ჰაერის მატარებელი (მომცველი) გონიერი, ფანტასტიკური არსება; აქვს უნარი გადაიქცეს ადამიანად ან ცხოველად; ზღაპრულ ფილმებში მისი სული ხშირად მივიწყებულ ჭურჭელშია
გამომწყვდეული და ვინც გაანთავისუფლებს მიიღებს, ბუმბერაზ, ძლიერ, ლამის ”ყოვლისშემძლე” მორჩილ არსებას... (მაგარია!..)

სრულასაკოვან მკითხველს თემის თავისებური გაგრძელება შეუძლია მეზობელ გვერდზე იხილოს, ანუ:

სალაღობო, საკიცხავი, სააშიკო და... Amusing, blameworthy, amorous and…

========
***====